Kiniddaw ti Alliance of Concerned Teachers (ACT) iti Department of Education (DepEd) a mangipaay iti "nalawag ken masinunuo a gannuat" no kasano a makissayan ti trabaho dagiti mannursuro iti pagadalan.
"Maulit-ulit a madakamat dagitoy a gandat a palag-anenda kano ti trabaho dagiti mannursuro ngem agingga ita, awan pay nalawag a mekanismo no kasano nga aramidenda dayta," kinuna ni ACT Chairperson Vladimer Quetua.
Innayon ni Quetua nga awan pay makitada nga umno a bilang dagiti education support personnel kadagiti pagadalan.
Iti napalabas a lawas, kinuna ni DepEd Undersecretary ken Spokesperson Michael Poa a mayalnag ti pagannurotan a mangkissay iti trabaho dagiti mannursuro kalpasan ti sumagmamano pay a lawas.
Manipud Kadagiti Agdama a Kameng ti Bannawag: Dios ti Agngina!
Insungbat ti ACT a kongkreto a plano ti kasapulan dagiti mannursuro a saan ket a sao laeng.
Segun iti ACT, adda latta para administratibo a trabaho dagiti mannursuro iti publiko a pagadalan idinto a nangrugin ti bakasion idi Hulio.
Kabayatan ti panagbakasion dagiti ubbing, kinuna ti ACT nga adda pay tamingenda a report ken dokumento nga ipaaramid ti DepEd.
Innayon pay ti ACT a malaksid iti panagaramidda iti Individual Performance Commitment and Review Forms (IPCRF) ken panangimaton iti panagenrol iti pagadalan, nakipaset pay dagiti dadduma a mannursuro iti National Learning Camp (NLC) idinto a boluntario laeng koma daytoy.
"Agingga ita, adda pay laeng iti pagadalan dagiti mannursuro, imbes nga agin-inana ken agbakbakasiondan kalpasan ti dandani makatawen a panagisuroda," kinuna ni Quetua.
Iti biang ti ACT, ti "kongkreto" a pakakitaan a makissayan ti admistratibo a trabaho dagiti mannursuro ket daytay adda mainayon nga empleado ken mannursuro, mapaababa ti oras ti panagisuro, ken panangipaay kadagiti mausar a ramit iti panagisuro.
(Merlina Hernando-Malipot/Manila Bulletin)
