Inanamongan ti United Nations General Assembly (UNGA) ti resolusion nga indatag ti Filipinas, ken dagiti dadduma pay a pagilian, a mangbigbig iti takem ti Permanent Court of Arbitration (PCA) iti natalinaay a pannakarisut dagiti riri.
Inabrasa ni Foreign Affairs Secretary Enrique Manalo daytoy nga irarang-ay ket kinunana a ti resolusion ket tulong ti Filipinas iti "panangitandudo iti panagturay ti linteg tapno mataginayon ken agtalinaed ti talinaay iti sangalubongan."
Innayonna pay nga iladawan ti resolusion ti nauneg ken natibker a panagtalek iti natalna a pannakarisut dagiti riri.
Iti resolusion ti UNGA, inawisna dagiti kameng a pagilian nga usarenda daytoy a serbisio ti International Court a katulongan iti gandat ti UN a mangitandudo iti kapia iti sangalubongan ken ti pannakapasayaat ti sangalubongan a linteg.
Manipud Kadagiti Agdama a Kameng ti Bannawag: Dios ti Agngina!
Kinuna ni PCA Secretary General Marcin Czepelak a napateg ti mensahe ti resolusion a mangaw-awis iti pannakipaset ti sangalubongan iti namunganayan nga urnos ti PCA, idinto a nagyaman ni Manalo kadagiti 122 a co-sponsor, kangrunaan ti Australia, Egypt, Guatemala, Hungary, ken Thailand a kameng ti kangrunaan a grupo a nangsuporta iti resolusion ken nangipanamnama a maanamongan daytoy babaen ti nagkaykaysa a kapanunotanda.
Naipasdek idi 1899 nga addaan 122 a kameng, maysa nga internasional a gunglo ti PCA a nakabase iti The Hague, The Netherlands a mangrisrisut kadagiti nadumaduma a riri iti sangalubongan.
Imatonan ti PCA ti uppat kadagiti lima a wagas ti panangrisut iti riri a sagudayen ti Article 33 ti UN Charter, nga isu dagitoy: panagsukimat, panangibabaet, panagkapia, ken panangrisut, a tumulong iti panangurnos ti International Court of Justice.
Ni Philippine Ambassador to The Hague J. Eduardo Malaya ti dauluen ti Administrative Council a mangituray iti PCA.
Joseph Pedrajas/Manila Bulletin
