Iti panangidaulo ti Department of Justice (DOJ), ti Presidential Anti-Organized Crime Commission (PAOCC), ken Cybercrime Investigation and Coordinating Center (CICC) agraman ti National Bureau of Investigation (NBI) ken Philippine National Police (PNP), rinautda ti mapapati a taeng ti cyber scam iti Pasay City itoy a lawas.
Mapan a dua bulan a sinisiim dagiti autoridad ti mapapati a taeng dagiti cyber scammer, segun iti impormasion nga indanon ti impormante ti DOJ ken DICT-CICC (Department of Information and Communications Technology-Cybercrime Investigation and Coordination Center). Iti pannakapaneknekda a maus-usar ti makuna a pasilidad kadagiti nadumaduma nga online scam, nayawaten ti kaso iti NBI a nangkiddaw iti warrant manipud iti korte tapno sukisoken, alaen, ken amirisenda dagiti datos dagiti kompiuter.
Rinibu a SIM card, nasurok a 800 a kompiuter, agarup 2,000 a selpon ken sumagmamano a ramit a pang-scam ti natakuatan dagiti autoridad, idinto a 650 a tao a Filipino, Intsik ken Indiano, ti tiniliwda.
Nakaalada pay kadagiti ebidensia a dagitoy a tao ti mangus-usar iti pasdek iti panagaramidda iti nadumduma nga scam, kas iti romance scams, crypto investment scams, phishing scams, ken task scams.
TURISMO: Intayon Idiay Ayuyang Garden iti Pila, Siudad ti Laoag!
Segun iti autoridad, ti makuna a taeng ti cyber scam ket maar-aramat met kadagiti panang-spam wenno tay panangipatulod iti malicious link kadagiti agus-usar iti internet, gapu ta adda natakuatanda nga sms blaster wenno ‘tay ramit a mausar tapno makaipatulod iti binulto a text message.
Natakuatan pay ti autoridad dagiti iskrip a mangguyugoy iti tao iti love scam. Gayyemen nga umuna ti scammer ti biktimaenna agingga mabukel ti relasionda online. No maalan dagiti scammer ti panagtalek ti biktima, gutigotenda daytoy nga agpuonan iti peke a crypto investment program.
Ni DOJ Undersecretary Nicholas Felix Ty ti nangidaulo iti sibubukel nga operasion. Inwayat ti DOJ Office of Cybercrime ti umuna a forensic examination a kinadua ti gunglo dagiti eksperto iti cybersecurity manipud iti Cybercrime Investigation and Coordinating Center (CICC) nga idauluan ni Director Rojun Hosillos. (Art Samaniego/Manila Bulletin)
