Nangilatang dagiti opisial ti probinsia ti Cagayan iti aganay a PhP52 a milion kalpasan ti pannakaideklarar ti state of calamity iti probinsia tapno maaramat para iti rehabilitasion manipud iti pannakadidigra ken relief operations dagiti naapektaran ti bagyo nga "Egay" iti 26 a munisipalidad ken maysa a siudad ti probinsia.
Sangsangkamaysa nga inaprubaran ti Sangguniang Panlalawigan (SP) nga idauluan ni Bise Gobernador Melvin K. Vargas Jr. ti rekomendasion ni Gobernador Manuel Mamba a maisayangkat ti madagdagus a rehabilitasion ken pannakaited iti ayuda iti 27,940 a pamilia wenno 93,237 nga apektado nga indibidual.
Mairaman kadagiti kakaruan a dinalapus ti bagyo dagiti ili ti Sanchez Mira, Aparri, Santa Ana, Abulug, Calayan, ken Santa Teresita.
Nangipaay ni Presidente Ferdinand R. Marcos Jr. iti relief aid a sag-PhP3-milion kadagiti nasao nga innem nga ili. Para iti probinsia, PhP15 a milion ti intedna a relief aid.
Adu met ti naapektaran kadagiti ili ti Iguig, Lasam, Ballesteros, Enrile, Tuao, Camalaniugan, Abulug, Allacapan, ken Pamplona.
Dua a munisipio ti nangideklarar iti state of calamity, ti Sanchez Mira ken Calayan. Kangrunaan a naapektaran dagiti mannalon ken mangngalap kadagitoy nga ili ta nadadael dagiti mulada ken dagiti bangka a pagkalkalapda.
Awan ti naireport a pimmusay iti Cagayan kabayatan ti panangdidigra ni "Egay" ngem 20 a tao ti nadangran idinto nga uppat a rescuer ti Philippine Coast Guard ti mapukpukaw pay laeng.
Segun iti nakalapda a datos ti namsaakan ti bagyo, kinuna ti SP nga aganay a PhP465-milion ti nadadael iti agrikultura, kangrunaan ti mais (PhP289-milion) ken pagay (PhP38-milion). Kadagiti met dingo (livestock), immabot iti PhP1.5-milion ti pukaw.
Mapan met a PhP862.3-milion ti dadael iti impraestruktura. Kadagiti naireport a nadadael a balay, 83 ti interamente a nadadael ken 1,542 ti partial a nadadael. (Philippine News Agency/ Manila Bulletin)
(Ladawan ti header: Cagayan Provincial Information Office)
