Kinuestionar ti Commission on Audit (COA) ti P8.278-bilion a nagastos ti Philippine Health Insurance Corporation (PhilHealth) iti Reverse Transcription-Polymerase Chain Reaction (RT-PCR) test para iti COVID-19 manipud iti 2020 agingga iti 2022 gapu iti saan nga umisu a pannakaaramid dagiti case investigation form (CIF).
Segun iti 2022 Annual Audit Report ti COA, nailanad iti memorandum of agreement (MOA) ti PhilHealth ken ti saan a nainaganan a partner contractor, a ti nasao a partner ti mangiwayat iti RT-PCR test ket ti met PhilHealth ti mangbayad iti magastos.
Manipud nangrugi ti panag-test agingga idi Disiembre 31, 2022, kinuna ti COA a nakaibayad ti PhilHealth iti aganay a PhP8,278,218,546.
Ngem kuna ti COA a saan nga umisu dagiti indatag ti PhilHealth a CIF isu a linabsing daytoy ti Seksion 4(6) ti Presidential Decree No. 1445 a mangibilbilin nga amin a pinansial a transakson ti ania man nga ahensia ti gobierno ket nasken a suportado iti kompleto a dokumentasion.
Manipud Kadagiti Agdama a Kameng ti Bannawag: Dios ti Agngina!
“Iti laksid a naipaganetgeten daytoy a banag kadagiti napalabas a panag-audit, a naigunamgunam ti kinapateg ti pannakaidatag dagiti CIF, 100 a porsiento a nagtalinaed a partial laeng wenno saan a nakompleto dagiti datos iti pormulario nga indatag ti PhilHealth," kinuna ti COA. (Czarina Nicole Ong Ki/ Manila Bulletin)
