Kiniddaw ni ACT-CIS Party-list Rep. Erwin Tulfo iti House of Representatives a repasuen koma daytoy ti agdama a manual ti operasion ti Bureau of Corrections (BuCor) a mangimatmaton iti New Bilibid Prison (NBP) itay Agosto 2.
Indatag daytoy ni Tulfo iti House Committee on Public Order and Safety a mangim-imbestigar iti mapapati a nalabes a karbengan dagiti dadduma a balud iti maximum security compound ti NBP.
Pinalutpot ni Tulfo dagiti opisial ti BuCor no apay nga ipalubosda kadagiti balud dagiti karbengan a kas iti panagorder iti taraon iti ruar ti NBP ken ti mailaylayon nga oras ti panagsarungkar.
Dinakamat pay ni Tulfo ti imbaga ni BuCor Director General Gregorio Catapang Jr. iti interbiu a dagiti nababaknang ken nabileg a balud ti mangiturturay iti nailian a pagbaludan iti Muntinlupa City.
Manipud Kadagiti Agdama a Kameng ti Bannawag: Dios ti Agngina!
Insungbat ni BuCor Senior Inspector Angelina Bautista, superintendente ti NBP, a paset dagiti kalintegan a naipaay kadagiti balud wenno persons deprived of liberty (PDL) dagiti nadakamat ni Tulfo. Daytoy ti namkuatan ni Tulfo a nangkuestion iti operations manual ti BuCor.
Insingasing ni Tulfo a rumbeng a marepaso ti manual ti Bureau of Corrections tapno makita ti kalintegan a dakdakamaten ti opisial ti BuCor ta iti panagkunana, kasla biddut daytoy gapu iti kinaadu unay dagiti karbengan dagiti balud.
Naiwayat ti nasao nga imbestigasion ti House Committee on Public Order and Safety gapu iti naireport a panagpukaw ti maysa a balud ken ti pannakatakuat iti "mass grave" iti uneg ti maximum security compound ti NBP, agraman ti panagtultuloy dagiti ilegal nga aramid. (ELLSON QUISMORIO/ Manila Bulletin)
