Ni Idelove Lopez ti Dingasan Integrated School iti Cabarroguis, Quirino, ti nangyalat iti Balitok a Medalia iti Wrestling (Boys-54kg) Junior Category iti Palarong Pambansa 2023 a naangay iti Marikina City idi Agosto 1-4, 2023. (Ladawan: Pammadayaw ti Dingasan Integrated School.)

Matungpal dagiti arapaap.

Puso ken laing ti inaramat ni Idelove B. Lopez,16, tapno magun-odna ti Balitok a Medalia iti Wrestling (Boys-54kg) Junior Category iti Palarong Pambansa 2023 a naangay iti Marikina City idi Agosto 1-4, 2023.

Pinarukma ni Lopez ti kasalisalna a ni Emmanuel Pepito (Region VI - Western Visayas) para iti kampeonato.

Inyalat ni Lopez ti kaunaan a Balitok a Medalia para iti Dingasan Integrated School iti Cabarroguis, Quirino, ket maibilang itan a pagtamdan dagiti padana nga ubbing, wrestler, ken dadduma pay nga agrayo iti isports iti pagilian.

Eksklusibo iti Website
TURISMO: Intayon Idiay Ayuyang Garden iti Pila, Siudad ti Laoag!

TURISMO: Intayon Idiay Ayuyang Garden iti Pila, Siudad ti Laoag!

"Daytoy Balitok (a Medalia) ket saanko laeng a bukbukod, idatonko met kadagiti coach-ko, iti pamiliak, ken iti entero a pagadalan. Iti Dingasan Integrated School, agyamanak iti impaayyo a gundaway, panagtalek iti kabaelak ken agtultuloy a panangsuportar. Rugrugi pay laeng daytoy, ket ikarik nga ibukbokko amin a laingko iti tunggal pannakisalisalko," kinuna ni Idelove.

Maragsakan met da William T. Lopez ken Rosita T. Buyuccan ti panagkampeon ti anakda a ni Idelove.

Ni Abel M. Decoran, a Trainer, ti nangipaay iti natibker a pundasion iti panagballigi ni Lopez, kaduana ti coaching team nga indauluan ni Coach Mirasol P. Clarabajal. (Teksto: Pammadayaw ti Dingasan Integrated School)