Siiinget a kinondenar ti Philippine Coast Guard (PCG) ken Armed Forces of the Philippines (AFP) ti inaramid ti barko ti China Coast Guard (CCG) 4203 iti dua a bilog (wenno bangka) ti Filipinas idi Sabado, Agosto 5.
Nangibaon ti AFP iti dua a bangka ti Filipinas a kinuyog ti barko ti PCG a mangidanon iti taraon, danum, gasolina, ken dadduma a suplay para iti barko a BRP Sierra Madre iti Ayungin Shoal (Second Thomas), West Philippine Sea (WPS) idi Sabado ngem dimteng ti CCG 4203 a nangbangen kadagiti dua a bilog. Gapu itoy, saan a nakadanon ti maysa kadagiti bilog iti BRP Sierra Madre.
Kinuna ni Commodore Jay Tarriela, PCG spokesperson iti WPS, nga aw-awagan ti PCG ti imatang ti China Coast Guard a pawilan koma daytoy dagiti puersana, agraem iti soberania ti Filipinas iti Exclusive Economic Zone (EEZ), agsardeng iti pananglapped iti wayawaya ti panaglayag, ken mangaramid iti mayanatup a tignay a maibusor kadagiti nagaramid iti di nainkalintegan a panangbangenda kadagiti dua a bilog ti Filipinas.
Innayon ni Tarriela a di pinanunot ti barko ti China ti kinatalged dagiti kameng ti PCG ken dagiti mangsuplay a bilog, agraman ti sangalubongan a linteg, kas iti 982 United Nations Convention on the Law of the Sea (UNCLOS), ti 1972 Convention on the International Regulations for Preventing Collisions at Sea (COLREGS), ken ti 2016 Arbitral Award a nangwaswas iti panangtagikua ti China iti WPS.
TURISMO: Intayon Idiay Ayuyang Garden iti Pila, Siudad ti Laoag!
Idi Hunio 30, kastoy met laeng ti inaramid ti 11 a barko ti China agraman ti CCG 4203 a nanglapped manen iti dua a barko ti PCG a mapan met laeng iti Ayungin Shoal tapno mangted iti suplay iti BRP Sierra Madre. (Martin Sadongdong/Manila Bulletin)
