Daniw ni ALFREDO E. VERZOSA
Nagdir-i dagiti bat-og iti inka isasarungkar
Timrem ngisitna nga allawig, tangatangka a timpuar
Arigmo't naslep nga alipugpog iti kasamekan
Kadagiti aringgawis agsilud, agkurkuripaspaskan!
Makapasidduker nga ungor a pinikarmo
Waneswes ti angin a kasla di pulos agpullo
Saan a mabatok kinadamsakmo a layus
Maisalsalangguang sansanikua nga inka madalapus!
Ulpit ken sagaba, impilitmo nga impabaklay
Apges dagiti saplit, didigra awanan sarday
Naglusdoy a namnama, rumrumkuas a suron
Sasaibbek ken as-asug a tininep dagiti dalluyon.
Narnarsuod a patakder, pagtaengan inwallawallagesmo
Nagbannogan nga adu a dinguen, sinikbab met ti alikuno
Nagbatir impennekmo, nagpagunggan a delubio
Napalaus a kinaranggas, dagensen nga impalak-ammo!
5 a Daniw
Permi a nagkas-ang, reggaay a namsaakam
Piman nga ab-abasto iti kapitakan naigamerdan
Napaidaman a kired, aduda a maimatangan
Ta awan met pulos imbatim kadakuada a pagsarkedan.
