Makapungtot ni Senador Raffy T. Tulfo iti naammuanna a mangipatulod ti gobierno kadagiti nangangato nga opisial ti Armed Forces of the Philippines (AFP) tapno agadal ken agsanay iti military academy iti China.
Impalgak daytoy ni Senador Francis Tolentino iti panagsasarita ti National Defense Committee ti Senado nga idauluan ni Senator Jinggoy Estrada itay Agosto 7, a pinasingkedan ni Department of National Defense (DND) Undersecretary Ireneo Espino.
Impaganetget ni Tulfo a nasken nga isardeng ti gobierno ti nasao a programa ta maibilang daytoy a pananglais kadagiti Filipino a rirriribuken latta ti China.
Dinakamat ni Tulfo ti agtultuloy a panangriribuk ti militar ti China kadagiti kameng ti AFP iti West Philippine Sea (WPS), kas iti napasamak idi Agosto 5.
TURISMO: Intayon Idiay Ayuyang Garden iti Pila, Siudad ti Laoag!
Indagadag pay ni Tulfo iti AFP nga ikkaten daytoy ti cellular tower a kukua ti gobierno ti China nga adda iti uneg ti kampo militar ti Filipinas.
Naammuan pay ni Tulfo a dagiti dadduma a ramit ti AFP, agraman dagiti kompiuter, ket indonar ti gobierno ti China.
Segun ken ni Tulfo, mangidatag daytoy iti Senate Resolution a mangimbestigar kadagitoy “makapadanag nga aramid.” (Mario Casayuran/Manila Bulletin)
