Mapan PhP116.6-milion ti pateg ti dinadael ti bagyo nga "Egay" iti ili ti Santa Teresita, Cagayan.
Segun iti Municipal Disaster Risk Reduction Management Office (MDRRMO) babaen ken ni LDRRMO Emerson C. Aleste, kadakkelan ti nadadael iti sektor ti agrikultura, nga umabot iti PhP101.5-milion. Mapan met PhP15.1-milion ti nadadael nga impraestruktura.
Nasurok met a sangaribu a pamilia, wenno nasurok a 4,000 a tattao, ti nakaro a naapektaran. Naipaayanen dagitoy iti tulong ken nabunongan iti relief goods.
Pagsayaatanna, sakbay pay a dumteng ti bagyo, naisaganan ti gobierno munisipal, iti panangidaulo ni Mayor Rodrigo De Gracia ken babaen ti MDRRMO, dagiti rebbengna a maaramid tapno maliklikan ti nakaro a pannakadidigra ti ili, nangruna kadagiti barangay a madanon ti layus.
TURISMO: Intayon Idiay Ayuyang Garden iti Pila, Siudad ti Laoag!
Binilin ni Mayor De Gracia dagiti punong barangay ti naynay a panagridamda ken naisagana dagiti evacuation center ken relief goods.
Malaksid kadagiti sanikua, mula, dingo, patakder a dinadael ti layus ken napigsa nga angin, awan ti naireport a natay wenno nadangran wenno mapukpukaw a tao iti Santa Teresita. (Edison Blancas Tobias)
