AYUDA PARA KADAGITI EMPLEADO. Sigurado a "sanaol," kuna dagiti empleado manipud kadagiti sabsabali a local government unit kalpasan ti panagiwaras ti gobierno probinsial ti Ilocos Sur iti saglilima a ribu a pisos iti tunggal empleado a permanente, kontraktual ken uray pay dagiti job order. Inwaras ti Provincial Accounting Office ken Provincial Treasurer's Office ti ayuda kalpasan ti panangiwaragawag ni Gobernador Jeremias "Jerry" Singson iti panangleppas ti flag raising ceremony a naangay iti Provincial Farmers Livelihood Development Center idi Agosto 7, 2023. Kinuna ni Gobernador Singson a tulong daytoy ti gobierno lokal kadagiti empleado a padapada a nakarikna iti epekto ni Super Typhoon "Egay" a nangduprak iti probinsia. Kiniddawna kadagiti empleado a sangsangkamaysada koma a bumangon ('We Rise as ONE') (Teksto:Mancielito S. Tacadena/ Ladawan: Pammadayaw ti Opisina ti Gobernador)
