Silulukaten ti 5th Abreñan Heritage Film Festival ti Sine Abreño para kadagiti ababa a pelikula ken dokumentario. Addaan daytoy iti tema a “Bannuar ni Abreño, Siglat ken Sirib ni Mannursuro” ken maangay inton Oktubre 5, 2023 iti Bangued, Abra.
Segun ken ni Dexter Macaraeg, nangpundar iti Sine Abreño ken direktor ti Abreñan Heritage Film Festival ken kameng ti Committee on Film ti National Committee on Culture and the Arts (NCCA), narugian idi Agosto 4 ken agingga iti Septiembre 5 ti panagawat kadagiti maisalip a pelikula.
Agpaay ti salip kadagiti mannursuro iti Abra kas pammigbig iti dakkel nga akem dagiti mannursuro ken dagiti agduduma nga istoria ti balligida iti propesionda. Maigiddan met ti film festival iti mismo a Teachers' Day (Okt. 5).
Inladawan ni Macaraeg,dagiti mannursuro kas "maingel wenno bannuar gapu iti anep ken kinasaldetda a buyogan ti dedikasionda a mangted adal ken sursuro kadagiti ubbing."
Manipud Kadagiti Agdama a Kameng ti Bannawag: Dios ti Agngina!
Ti ipasa a pelikula, masapul a 5 agingga 10 a minuto ti kapautna ken Ilokano wenno Tagalog ti mausar a lengguahe ken addaan iti subtitle nga English.
Silulukat ti salip kadagiti mannursuro ken estudiante a taga-Abra nga agduyos iti panagaramid iti pelikula. Nupay kasta, kinuna pay ni Macaraeg nga idinto a nakasentro ti Abra ti edision ti film festival iti daytoy a tawen, nawaya latta a makisalip dagiti adda iti sabali a luglugar ti Cordillera. (Maria Teresa B Beñas)
