Addan 1,700 a pasdek ti nadadael, idinto a 53 ti bilang dagiti natay, gapu iti puor a napardas a nagramaram iti akinlaud a paset ti isla ti Maui, Hawaii (USA) itay Agosto 10, segun ken ni Hawaii Governor Josh Green.
Kinuna ketdi kadagiti opisial ti Maui a di pay maitudo ti kinaasino dagiti natay, ken mabalin nga umad-adu pay.
Nagramaram ti uram iti historikal nga ili ti Lahaina, a sentro ti turismo ken ekonomia iti laud a Maui.
Nasurok 1,300 a residente ken turista ti nagkamang kadagiti emergency shelter idinto a dandani 1,400 ti um-umian ita iti eropuerto ti Kahului.
Manipud Kadagiti Agdama a Kameng ti Bannawag: Dios ti Agngina!
Kinuna dagiti opisial ti Maui a 80 porsiento a nalapdanen ti panagsaknap ti uram, idinto nga agingga ita a maisursurat daytoy, dua pay a puor ti parparmeken dagiti bombero: maysa iti Puleho (Kihei), ken maysa pay iti Kula.(Manipud iti CNN.com)
