Daniw ni AMADO I. YORO
Nasaem a sugat daytoy
iti barukong
Damsak ti uram a nangrebba
Iti kinapusaksak
Ti Valley Isle*
Ditoy daga ti Iao Valley
Ti daan a siudad, tugaw ti trono
Pagarian dagiti alii**
Simgiab kas iti dalipato ti Apuy
Ti pungtot ti nakaparsuaan
Natda dagiti dapo
Ti marunrunaw
A beggang
Yeg ti angin
A manglapunos
Lahaina***
Ditoy ti daan a pakasaritaan
A nagsaadan
Nadangkok nga init****
Aglulua ti tanap
Agdardara ti bulan
Nagayus iti naliday a pingping
Ti langit
Nagsaemen, aya, ti Sangit
Ken dung-aw
Dagiti tagibi
Iti ubba dagiti inna
Dagiti ulila ken napanawan
Ti pannakarba ti ili
Dagiti agsasamusam
A rissik-gil-ayab
Ken alipaga
Ti sumsumged nga ili
5 a Daniw
Adtoy ti panagsangit
Dagiti nauneg a sasainnek
Matinnagan iti lua
Iti awanan nagan a panagpasina
Kas iti pungtot ni Madam Pele
Kadagiti agburburek a lava
Sangitanka, Maui,
Bay-am a ti luak a sebsebanna
Ti uram
Iti awan ressatna
A pannakaulila
Ket iti ibabangon iti sabali
A pannakaipasdek ti monumento
Dagiti napasag ket dumtengto
Ti baro a panagtangkayag
Ti init
