Manamnama a bumaba ti presio ti bagas iti pagilian ta rinugianen ti Department of Agriculture (DA) ti makisarita iti Vietnam ken India ket addan naawat daytoy a nakananama a presio manipud kadagiti exporter ti bagas kadagiti nasao a pagilian.
Kinuna ni DA Agriculture Undersecretary Domingo F. Panganiban a linuktan ti DA ti pannakisarita iti Vietnam ken India kas imbilin ni Presidente Ferdinand “Bongbong” R. Marcos Jr., nga agpapay a sekretario ti DA.
"Kas resulta (ti pannakisarita, nangted dagiti Vietnamese exporter iti presio a US$30 agingga iti US$40 a nababbaba ngem iti impresioda iti kallabes a pannakimitingda iti Malacañang,” kinuna ni Panganiban.
Innayon ni Panganiban a nasaysayaat daytoy a presio para iti nayon a 300,000 agingga iti 500,000 a metriko tonelada a maangkat a bagas a manamnama a mangpaadu iti suplay ti bagas iti pagilian.
Manipud Kadagiti Agdama a Kameng ti Bannawag: Dios ti Agngina!
Makitintinnulong met ti DA iti gobierno ti India “tapno mapalubosan ti agtultuloy a panagangkat iti bagas" iti nasao a pagilian.
“Makatulong dagitoy (a panagangkat) a mangpababa iti presio ti bagas ta manaynayonan ti lebben ti pagilian a bagas, nga uray awan ti panagangkat, ket manamnama nga agpaut iti 52 agingga iti 57 nga aldaw agingga iti taraudi ti 2023,” kinuna pay ni Panganiban. (JEL SANTOS/ Manila Bulletin)
