Saan a naited dagiti dadduma a health care institutions (HCI’s) ti agdagup iti PhP535.6-milion a diskuento dagiti 196,695 a senior citizen idi 2022, segun iti Commission on Audit (COA).
Gapu itoy, imbaklay ti Philippine Health Insurance Corporation (PhilHealth) ti PhP113.1-milion a diskuento a di naikissay, idinto a binayadan ti senior citizen wenno dagiti ahensia ti gobierno a kas iti Social Welfare and Development (DSWD), Office of the President, Philippine Charity Sweepstakes Office (PCSO), ken gobierno lokal (LGUs) ti natda a PhP422.526-milion.
Iti 2022 audit report ti Philhealth, imbatad ti COA nga adda 103,630 a kaso a di naikkan iti diskuento dagiti senior citizen iti National Capital Region (NCR); 50,392 iti Central Visayas; idinto a 35,896 iti Davao Region.
Iti met Zamboanga Peninsula, adda 3,078 a senior citizen a di naikkan iti diskuento; 538 iti Western Visayas, 117 iti MIMAROPA; ken 44 met iti Bicol Region.
Segun iti Republic Act No. 9994, wenno Expanded Senior Citizens Act of 2010, maikkan dagiti pasiente a senior citizen iti 20 a porsiento a diskuento manipud iti "total actual health care" (bayadan ti pasiente iti ospital), ken ti "total actual professional fee" (PF) wenno bayadan ti pasiente iti doktor.
Manipud Kadagiti Agdama a Kameng ti Bannawag: Dios ti Agngina!
Ngem imbatad ti COA nga iti 2022, agdagup iti PhP535.626-milion a diskuento ti senior citizen ti saan a naikissay iti bayadanda iti ospital ken PF
Insingasing ti CoA iti Philhealth nga ammuenda koma ti kaadun ti kastoy a kaso tapno mataming dagiti parikut ken maaksionan ti Philhealth dagiti di agtutunos a pannakakuenta ken ti di pannakaipaay ti diskuento kadagiti senior citizen. (Czarina Nicole Ong Ki/Manila Bulletin)
