Tallopulo ket walo a pisos ti kalakaan a presio ti kada kilo ti bagas iti Metro Manila, segun iti datos a nakalap ti Department of Agriculture (DA).
Babaen ti Bantay Presyo (Price Watch) ti DA, naammuan a manipud Agosto 11, PhP38 agingga iti PhP60 ti presio ti lokal ken naangkat a bagas a mailaklako iti Metro Manila.
Ti kalakaan a bagas, ti Local Regular Milled, mailaklako manipud PhP38 agingga iti PhP49 kada kilo.
Ti met kanginaan, ti Local Special, mailaklako manipud PhP48 agingga iti PhP60 kada kilo.
Manipud Kadagiti Agdama a Kameng ti Bannawag: Dios ti Agngina!
Saan ketdi a nairaman iti datos ti Bantay Presyo ti Imported Regular Milled a bagas ta awan (saan nga available) daytoy kadagiti pagtagilakuan a sinukimat ti DA. Kayat a sawen ti "saan nga available" nga awan ti stock a masindadaan wenno mailaklako iti pagtagilakuan.
Kuna ti DA a sakupen ti inwayatna a market price monitoring dagiti pagtagilakuan iti bagas iti Commonwealth, Guadalupe, Las Piñas, Malabon, Marikina, Mega Q-Mart, Muntinlupa, Muñoz, Pasay, Pasig, Pritil, Quinta, ken San Andres.
Malagip a kabayatan ti kampania iti napalabas nga eleksion, imbunannag ni Presidente Ferdinand “Bongbong” R. Marcos Jr. a panggepna nga ipababa ti presio ti bagas iti PhP20 kada kilo. (JEL SANTOS/ Manila Bulletin)
