ONE ILOCOS SUR OTOP HUB. Silulukaten iti publiko ti One Ilocos Sur, One Town, One Product (OTOP) Hub a tarawidwidan ti gobierno probinsial ti Ilocos Sur, iti pannakitinnulong ti Ilocos Sur Export Enterprise Distribution Marketing (ISEED).
Masarakan ti OTOP Hub iti umuna a kadsaaran ti Provincial Farmers Development and Livelihood Center iti Siudad ti Vigan. Ditoy ti pakakitaan ken pakagatangan kadagiti nadumaduma a produkto a partuat ken patanor dagiti macro, small and medium enterprise (MSME) manipud iti 32 nga ili ken 2 a siudad ti probinsia.
Nainaguraran pay ti One Ilocos Sur Café a pakailakuan ti naimas a kape iti estilo a kasla Starbucks. Produkto a kape dagitoy manipud kadagiti upland municipalities a pakairamanan pay dagiti nangato ti kalidadna a kape kas iti rubosta a maimulmula iti Ilocos Sur. Maikkan iti 15% a diskuento dagiti empleado ti gobierno probinsial a gumatang ditoy.
Yaw-awis ti gobierno probinsial ti panagpasiar dagiti turista iti OTOP Hub tapno maramananda dagiti produkto ditoy. (Teksto: Mancielito S. Tacadena/ladawan: Pammadayaw ti Opisina ti Gobernador)
