Mapan a 93 ti kompirmado a natay, idinto nga agdagup iti 2,200 a pasdek ti nadadael, ken addan $6-bilion ti gatad ti napukaw, gapu iti uram a nangdidigra iti Lahaina, Maui, segun ken ni Hawaii Governor Josh Green.
Kinuna ni Green a ti uram iti Lahaina ti maibilang a kadakkelanen a didigra a napasamak iti Hawaii, ta inartapanen daytoy ti bilang dagiti biktima iti tsunami idi 1960 a nangkeltay iti biag ti 61 a tao.
Segun iti National Fire Protection Association (NFPA), daytoyen ti maikalima a kadadawelan nga uram iti historia ti Estados Unidos ken kakaruan manipud idi nauram ti Cloquet, Minnesota idi 1918 a nakatayan ti 400 a tao.
Kinuna ni US Senator Mazie Hirono ti Hawaii nga awan pagpambarna iti napasamak a didigra idinto a mangisayangkat daytoy iti pormal a pannakaimbestigar iti panagresponde dagiti autoridad.
Resolusion ti UN nga agkidkiddaw ti ceasefire iti Gaza, saan a pinaboran ti Estados Unidos
Kinuna ti Department of Foreign Affairs (DFA) ti Filipinas nga awan pay naawatda a report no adda Filipino a nadangran wenno natay iti uram iti Lahaina.
Segun ken ni DFA Undersecretary Eduardo de Vega nga adda 25,000 a Filipino-American iti Maui a mangbukel iti 17 a porsiento ti populasion ti isla.
Impaganetget ti opisial a nupay impakaammo kadakuada ti Maui Filipino Chamber of Commerce nga adda dagiti Filipino a nairaman iti 1,000 a mapukpukaw, di pay masinunuo no Filipino dagitoy, gapu ta kaaduan a Filipino iti Maui ket American citizen.
Innayon pay ti opisial a dagiti mangmangged iti tourist hotel-resort a di pay nasarakan ket mabalin a naipanda iti evacuation center wenno awan pangkontakan kadakuada. (Manipud iti CNN.com ken Manila Bulletin)
