Tinakderan ti Department of Environment and Natural Resources (DENR) nga adda 22 a reclamation project iti Manila Bay, saan a 13 a kas kinuna ti Philippine Reclamation Authority (PRA).
Iti maysa nga interbiu itay Agosto 14, kinuna ni PRA Assistant General Manager Joseph John M. Literal, a 13 laeng ti reclamation project iti Manila Bay, ket 22 iti entero a pagilian.
Ngem segun iti DENR, adda 22 a reclamation project iti Manila Bay Area -- nairaman iti bilang dagiti naikkan iti pammalubos, ken dagiti agiprosproseso pay laeng iti papelesda.
Kinuna ti DENR a no dakamaten ti Manila Bay, sakupen daytoy ti dakkel a paset manipud iti Rehion IV-A, NCR, ken Rehion III.
Manipud Kadagiti Agdama a Kameng ti Bannawag: Dios ti Agngina!
Inlawlawag ti DENR a dagiti 22 a reclamation project laeng iti Manila Bay ti nasuspende, saan nga iti entero a pagilian.
Sakupen ti suspension ti 15 a proyekto iti NCR, idinto a pito iti Region IV-A.
Innayon ti DENR a saan nga amin a 22 a reclamation project iti Manila Bay ket addaan iti permit, ECC (Environmental Compliance Certificates), ken dadduma pay a kasapulan a dokumento.
Impakaammo ti DENR a suspendido amin a 22 a reclamation projects kabayatan a mareprepaso dagitoy, kas imbilin ni Presidente Ferdinand “Bongbong” R. Marcos Jr.
Ngem idi Agosto 13, imbatad ti gunglo a Pambansang Lakas ng Kilusang Mamamalakaya ng Pilipinas (Pamalakaya) nga agtultuloy latta dagiti reclamation project iti Cavite. (Jel Santos/Manila Bulletin)
