Maammuanen itoy a Septiembre dagiti maipaayan iti cash aid ti Pantawid Pamilyang Pilipino Program (4Ps) apaman a malpas ti Department of Social Welfare and Development (DSWD) ti pannakaamiris manen dagiti benepisiario.
Segun ken ni DSWD Secretary Rex Gatchalian, adda napasamak a pannakaitantan iti pannakaibunong ti cash aid gapu ta madama a maam-amiris manen dagiti benepisiario a maibilang a "marigrigat" babaen ti indicator tool ti DSWD.
"Naitantan bassit ti pannakaited ita a tawen ta ti pakaibasaran ti 4Ps a Listahanan (listaan dagiti maikari a benepisiario), naaramid pay la idi 2019-2020, a panawen ti lockdown gapu iti COVID," kinuna ni Gatchalian.
Kasapulan a maamiris manen dagiti benepisiario agsipud ta mapan a 700,000 a pamilia a maibilang a "nagturposen" a kas "marigrigat" segun iti pagalagadan ti DSWD ti nagsubli kalpasan ti lockdown ta segun kadagitoy, nagbalinda manen a "marigrigat."
Manipud Kadagiti Agdama a Kameng ti Bannawag: Dios ti Agngina!
"Nagkiddawda iti pannakaamirisda manen ta kunada a nagsublida a marigrigat ta naawananda iti trabaho, ken naapektaran ti pamiliada gapu iti COVID," innayon pay ni Gatchalian.
Impanamnama ketdi ni Gatchalian a malpaston ti pannakaamiris dagiti benepisiario iti panagtapos ti Septiembre.
Mapan a PhP96-bilion, wenno kagudua ti budget ti DSWD, ti nailatang para iti 4Ps.
"Madagdagus a mausar ti nailatang a budget para kadagiti 4Ps apaman a malpas ti pannakaamiris,” kinuna ni Gatchalian. (RAYMUND ANTONIO/ Manila Bulletin)
