Babaen ti botos a 265-0-3 (pabor-saan a pabor-saan a nagbotos) iti plenario itay Agosto 16, inkeddeng dagiti kameng ti Kamara nga ikkatendan a diputado ni Negros Oriental 3rd District Rep. Arnolfo Teves Jr., maibatay iti 16-panid a report ti Committee of Ethics and Privileges (CEP).
Segun iti pagannurotan ti Kamara, masapul nga adda 2/3 a botos tapno maikkat ti maysa a diputado.
Ti pannakaikkat ni Teves ti maikatlo - ken maudin - a pannakadusana kalpasan a napatawan iti dua a 60-aldaw a suspension. Naikkat metten ni Teves iti komite a pagkamenganna.
Segun iti committee report nga imbasa ni COOP NATCCO Party-list Rep. Felimon Espares iti plenario, naipaayen ken ni Teves ti umno a proseso ken natibker ti ebidensia a nakalap ti CEP.
TURISMO: Intayon Idiay Ayuyang Garden iti Pila, Siudad ti Laoag!
Idi Marso 4, napapatay iti katengngaan ti aldaw ni Negros Oriental Governor Roel Degamo; idinto a napan iti ballasiw-taaw ni Teves ta mapabpabasol daytoy a kas utek iti pannakapapatay ni Degamo.
Malaksid iti daytoy, inraman pay ti CEP ti report ti Anti-Terrorism Council's (ATC) ti panangideklararda a maysan a terorista ni Teves. (Ellson Quismoro/Manila Bulletin)
