5-Bannawag

Si no eres músico, mantente
alejado de ellos

nalabsak dagiti nakatugaw
nga instrumentot' orkestra iti
saan met nadagaang nga aldaw:
kampanada anian panagbusi.

mayat panagaabayda, mayat
pati daydiay in-innallawatda
'ti balikas inda a yab-ablat –
ay! musikoak ket denggek ida.

'no ammalannan 'diay padilak, ay!
agang-angsabakon iti ragsak,
abotko aminda malinglingay
no ramaynan pumempendeg kaniak.'

daydiay ni klarinete't sikigan
ni baritone sax a sumigsiggan.

'wen, uray siak,' ni baritone sax 'diay
bimmallaet, 'no ngusonan innan
imudmudumod 'toy padilak, 'nian
riknak kayatkon dagus agtaray.'

sinilpuanna 'diay balikas, 'ay! la
ketdi pangabak 'diay takong kaniak
awan ta uray raongna bumtak
iti pigsana mangbettak daga.'

'kasla padilak 'tay masepsepan
no pagsisilpuennan 'tay do la mi
iti abotko nga agpababa –
aggargaraigiak kamatendan.'

anian a gargarraigi ken dir-i,
kunak, ania ketdin a tunosda.

'ala, ket siak, adda met maibagak,'
daras a simmampitaw plauta 'ti
dap-ayan dagiti napnuan ragsak,
kampanada busi la a busi.

'no pugpug-awannan 'toy ngiwatko
kayatkon 'tay malmesak ragragsak,
kaslaakon tiubibo't lubongko,
iskala't musika adut' pumsuak.'

dinengngegdat' panagsaritana
ni plauta – pito't sagpaminsan 'tay
yaw-awagda – 'tay notana adda
iti bibig 'diay kas mangpirpirsay.

piangpiang, redoblante ken tambor 'tay
dumdumngeg met inda isalapay.

adda met biolin nga itay pay la
a dumdumngeg tungtunganda sakbay
inda manen a mangisalapay
'ti linas nga uyosen musika.

'no kuerdaskon 'tay gudagodannan,
'diay timidna kaniak aglanlandag,
mariknak kinasayaatna 'toy biag,
bay-am ditan no siak mayaw-awan.'

intuloyna, 'panangibaw-ingna
'diay timid nga aglanlandag, ay! siak
daydiay madukotan a ta pati
ramramayna kumamatkamatda.

daydiay, kaniak, daytay sungdot' ragsak
no 'tay areng-engkon diak maipakni.'

ni kornetin 'ti abay trombone 'tay
nangidasar 'ti padas budkodna:
'no 'toy bokiliak deppelannan, ay!
daytan, kunak ngarud, santisima.'

adda innayonna, 'no dilanan
agkulkulagtit a danggayan met
ramramayna iti piston, saan,
agpakaasiak, awan ebbet.'

awan dakkel a nagdumaanda
'ti trombone, bombardino, baho pay,
nakitak ti panagrimat mata,
saritada nangted ti murmuray.

no madilaanda am-aminen
'tay sipsipat agkakamakamen.

5