Daniw ni REYNALDO A. DUQUE
Siak ti apuy, sika ti lam-ek
Ti apuy mangted bara iti nepnep;
Ti lam-ek mangted lamiis iti kalgaw.
Maysaka a langit, maysaak a tanap;
Langit ti yan ti bituen, dawa iti tanap;
Ti bituen, mangted silaw; dawa ti biag.
Siak ti panunot, sika ti puso
Ti panunot, agamiris; ti puso, agayat,
Ti agbiddut, mangako; ti agayat, mamakawan.
Kaniak, anus; kenka, alumamay
Ti naanus, tawidenna ti lubong;
Ti naalumamay, tawidenna ti langit.
5 a Daniw
Maysaak a daniw; maysaka a kansion
Ti daniw parmekenna ti lubong,
Ti kansion parmekenna ti kararua.
Siak ti tinapay; sika ti arak
Ti tinapay ti bagi; ti arak ti dara.
Ti bagi ti lasag; ti dara ti kararua.
Siak ti ama; sika ti ina
Ti ama ti puso ti balay;
Ti ina ti kararua ti pagtaengan.
Siak ti Genesis; sika ti Apokalipsis
Ti Genesis ti punganay ti lubong;
Ti Apokalipsis, rugi ti biag nga agnanayon.
