Nangrugin ti panagapit kadagiti probinsia ti Isabela, Nueva Ecija, ken North Cotabato isu nga umadu ti suplay ti bagas iti pagilian ket makatulong iti pannakapatalged ti presio ti bagas, segun iti Department of Agriculture (DA).

Kinuna ni DA Undersecretary for Rice Industry Development Leocadio Sebastian nga addan aganay a 900,000 tonelada metrika a bagas a napataud manipud iti nasao a 3 a probinsia.

Innayon ni Sebastian a nakapagraep idi Mayo dagiti mannalon iti 3 a probinsia, wenno nasapsapa ngem iti gagangay a panagraraep iti dadduma a pagtatalonan iti pagilian.

Segun iti DA, agtultuloy ti agdama a panagapit agingga iti Septiembre.

Kinuna pay ni Sebastian a katibokto ti panagapit iti taraudi ti Septiembre agingga iti Oktobre, a mangnayon iti maikadua a semestre (Hulio agingga iti Disiembre) ti produksion ti pagilian iti mapan a nasurok a 11-milion a tonelada metrika.

“Iti laksid ti mabalin a kaadda ti napipigsa a bagyo kadagiti sumarsaruno a bulan a mabalin a makaapektar iti Central ken Northern Luzon, panggeptayo ti makaaapit iti agingga iti 11.5-milion a tonelada metrika iti maikadua a semestre ti tawen,” kinuna ti undersecretary.

Segun iti report ti Philippine Statistics Authority (PSA) itay nabiit iti nailian a produksion manipud Enero agingga iti Hunio 2023, ngimmato daytoy iti 9-milion a tonelada metrika, manipud iti 8.7-milion a tonelada metrika a produksion iti isu met la a bulbulan idi 2022 ken 2021. 

Segun iti DA, dakkel a tulong daytoy a nangatngato a produksion para iti umdas a suplay ti bagas ti pagilian agingga iti panaggibus ti 2023 iti laksid ti epekto ti Super Typhoon "Egay." (Jel Santos/ Manila Bulletin)