Naispal ti Malabon City Police Station (MCPS) ti maysa a babai a Taiwanese manipud iti nangkidnap kenkuana a Chinese national.
Kinuna ni National Capital Region Police Office (NCRPO) director Brig. Gen. Jose Melencio Nartatez nga inwayat ti MCPS Substation 1 ti operasion kalpasan a naawatda ti awag manipud iti gayyem ti biktima idi Agosto 20.
Naibaga ti immawag a babai ti manamnama a yan ti biktima babaen ti Global Positioning System (GPS) iti selpon daytoy, a nangipatuldo iti maysa a balay iti Victoneta North iti Barangay Potrero, Malabon.
Nagsiim a dagus dagiti polis ti Malabon iti lugar, ket idi napatalgedanda ti report, rinautdan ti balay ket inispalda ti biktima nga agtawen iti 35.
TURISMO: Intayon Idiay Ayuyang Garden iti Pila, Siudad ti Laoag!
Kinemmeg dagiti polis da Zheng Xi Lin, 34, ken Ma Pun Xi, 36, nga agpada a taga-China ken agindeg iti balay a yan ti biktima.
Iti panagimbestigar ti polis, kinuna ti biktima nga adda nangawis kenkuana a gayyemna nga agsarakda iti Malate, Manila idi Agosto 14, ngem saan a nagparang ti kasinnarakna, ket sumagmamano ketdi nga Intsik a lallaki ti nangala kenkuana.
Malaksid iti panakarames ti biktima, dandani US$125,000 ti kuarta a dinawat dagiti suspek kenkuana.
Kinuna ni Nartatez a madama ti follow-up operation kadagiti dadduma pay a suspek, idinto a maisagsaganan ti darum kadagiti natiliw a suspek. (Aaron Recuenco/Manila Bulletin)
