Inaklon ni Department of Agriculture (DA) Undersecretary for Rice Industry Development Leocadio Sebastian iti House Committee on Appropriations, a saan a paset ti plano ti DA a maipababa ti presio ti bagas iti PhP20 tunggal kilo.
Iti panakatingiting ti budget ti DA para iti 2024, dinakamat dagiti kongresista ti inkari ni Presidente Ferdinand "Bongbong" Marcos Jr. idi panawen ti kampania, a pababaenna ti presio ti bagas iti PhP20 tunggal kilo.
Pinalutpot ni House Deputy Minority leader ken Basilan Lone District Rep. Mujiv Hataman no karaman met laeng ti PhP20 (tunggal kilo) a bagas iti plano ti DA, no kaano a matungpal daytoy, ken no kabaelan met laeng daytoy ti gobierno.
Awan ti nasinunuo a sungbat ni Sebastian, ngem idi agangay, inaklonna a saan a paset ti plano ti DA ti PhP20 tunggal kilo ti bagas. (Ellson Quismorio/Manila Bulletin)
