Impeksa ni Santa Teresita, Cagayan Mayor Rodrigo De Gracia ti panagyaman ti gobierno munisipal kadagiti tulong a naawat ti ili kadagiti naapektaran ti kallabes a bagyo itay Hulio.
Kangrunaan a nagyamanan ti munisipio ni Presidente Ferdinand Marcos Jr., kasta metten kada Senador JV Ejercito, Senador Bong Go, Senador Loren Legarda, Diputado Sandro Marcos, iti Philippine Military Academy (PMA) Class 1982, ken iti TV5 Network.
Nakaur-or ti munisipio iti aganay a PhP8-milion a naipaay kadagiti napakaruan a pamilia.
Iti maysa a naisayangkat a programa idi Agosto 21, indauluan ni Mayor De Gracia, a kaduana da Bise Mayor Ruben Fagela Sr. ken Municipal Social Welfare and Development Officer Marivic T. Viesta, ti pannakaibunong dagiti ayuda.
Manipud Kadagiti Agdama a Kameng ti Bannawag: Dios ti Agngina!
Mapan a 1,250 a household ti naipaayan iti relief packs ken umabot iti 1,000 nga indibidual ti naayudaan iti sag-PhP2,000.
Kadagiti sangapulo ket tallo a barangay ti Santa Teresita, kadagiti barangay nga adayo iti poblasion, adda naituding a drop off points a pangalaan dagiti benepisiario iti ayuda. Dagiti adda iti asideg, kas iti Centro West ken Centro East, napanda iti Municipal Disaster Risk Reduction Management (MDRRM) Operation Center.
Immatendar met iti nasao a prgrama da Benevolent Lady's Association of Santa Teresita (BLAST) Executive President Jocelyn O. De Gracia, Sangguniang Bayan Member Jovey DG. Eduria ken dagiti kameng ti Philippine National Police nga idauluan ni Police Major Geoffrey C. Retreta. Binayabay ida dagiti kameng ti Philippine Army ken Philippine Marines. (Teksto: Laylany Toribio / Ladawan: Mark Lester Gorose)
