Ik-ikkaten daytoy a maestra iti Aurora A. Quezon Elementary School iti Malate, Manila dagiti dekorasion iti classroom-na kas panangtungpal iti order ti DepEd iti pannakaikkat ti amin a dekorasion iti uneg ti classroom a pakairamanan dagiti tradisional nga educational posters ken dadduma pay a visual teaching aids. (ARNOLD QUIZOL / MANILA BULLETIN)

Iti laksid dagiti kritisismo, impinget ti Department of Education (DepEd) ti desisionna a maikkat amin a "saan a kasapulan" a bambanag iti uneg dagiti classroom kadagiti eskuela tapno maipamaysa dagiti agad-adal ti atensionda kadagiti mannursuro ken leksionda kabayatan ti panagklaseda.

Segun ken ni Bise Presidente ken DepEd Secretary Sara Duterte, naibasar ti naagapad a desision iti DepEd Order No. 21 wenno 2023 Brigada Eskwela Implementing Guidelines ket masapul a masurot daytoy.

“Ti order ket order,” kinuna ni Duterte. “Ikkaten amin-amin a naipan iti diding (dagiti classroom) ket bay-an dagiti agad-adal a mangipamaysa kadagiti leksionda,” innayonna.

Naipaganetget iti nasao a DepEd Order ti pannakataginayon dagiti nadalus wenno nadalimanek nga eskuela.

Eksklusibo iti Website
TURISMO: Intayon Idiay Ayuyang Garden iti Pila, Siudad ti Laoag!

TURISMO: Intayon Idiay Ayuyang Garden iti Pila, Siudad ti Laoag!

Maysa pay a maestra iti Aurora A. Quezon Elementary School iti Malate, Manila. (ARNOLD QUIZOL / MANILA BULLETIN)

Imbilin ti DepEd kadagiti eskuela a masapul a masigurado a dagiti arubayan, classroom, ken amin a diding wenno pader ken dadduma pay a pasilidad ti eskuela ket "kanayon a nadalus ken awanan kadagiti saan a kasapulan nga artwork, arkos, tarpaulin, ken posters.”

Nadakamat pay iti annuroten a masapul nga ikkaten dagiti eskuela dagiti "dadakkel a signage nga addaan iti komersial nga anunsio, waragawag ti panangisponsor ken/wenno panangendorso wenno ania man a kita ti pakaammo."

Maysa met laeng maestra iti Aurora A. Quezon Elementary School iti Malate, Manila a mangik-ikkat kadagiti naipigket a dekorasion iti diding ti classroom-na. (ARNOLD QUIZOL / MANILA BULLETIN)

Naibilin kadagiti lokal nga opisial ti DepEd a pakairamanan dagiti daulo ti para publiko nga elementaria ken sekondaria nga eskuela a masapul a siguraduenda nga "awan ti naikabil a poster, arkos wenno dadduma pay a naipaskil a bambanag kadagiti diding ti classroom."

Innayon pay ti DepEd a saan a rumbeng a mausar dagiti classroom a pagilebbenan kadagiti gamigam ken nawaya iti dadduma pay di maus-usar a bambanag wenno bambanag a maibelleng." (Merlina Hernando-Malipot/ MANILA BULLETIN)