Imbutaktak ni Armed Forces of the Philippines (AFP) Chief of Staff Gen. Romeo Brawner Jr. dagiti pangta ti China iti West Philippine Sea (WPS) iti panagtataripnong dagiti nangato a dadaulo-militar a naangay iti Nadi, Fiji.
Dimmar-ay ni Brawner iti 25th Annual Indo-Pacific Chiefs of Defense (CHODs) Conference a buklen dagiti nangato a dadaulo dagiti armada ti 27 a pagilian tapno tamingenda dagiti parikut iti rehion, ken mangilunglungalong iti naibatay-linteg a kinaurnos iti Indo-Pacific.
Ni General Xu Qiling a deputy chief of staff ti Joint Staff Department of China's Central Military Commission ti imbaon ti China a delegado iti komperensia.
Situtured a dinakamat ni Brawner ti 2016 Arbitral Ruling a nangpabor iti panangtagikua ti Filipinas iti WPS, ken nangwaswas iti panangtagikua ti China iti South China Sea (SCS).
TURISMO: Intayon Idiay Ayuyang Garden iti Pila, Siudad ti Laoag!
Impakita pay ni Brawner ti video ti China Coast Guard a nangipaturong iti water cannon iti bilog ken iti barko ti Philippine Coast Guard (PCG) a mangitulnog iti suplay iti BRP Sierra Madre iti Ayungin (Second Thomas) Shoal idi Agosto 5.
Ngem insungbat ti delegado ti China a saanda a bigbigen ti 2016 arbitral ruling ken impettengda a kukuada ti South China Sea.
Kinablaawan dagiti delegasion ti US, Australia ken Japan ni Brawner gapu iti situtured a panangibatadna iti pangta ti China iti WPS, ket kinunada a husto laeng ti inaramid ni Brawner, ken inur-urayda laeng nga aramidenna daytoy. (Martin Sadongdong/Manila Bulletin)
