Isagsaganan ti Opisina ti Ombudsman ti pannakaipila ti kaso a kriminal iti Sandiganbayan kontra kada dati a Department of Budget and Management (DBM) Undersecretary Lloyd Christopher A. Lao, Overall Deputy Ombudsman Warren Rex H. Liong, DBM Procurement Management Officer Paul Jasper V. De Guzman, ken lima nga opisial ti Pharmally Pharmaceutical Corporation mainaig iti panaggatang ti gobierno iti agpateg iti PhP4.165-bilion a COVID-19 test kits idi 2020.
Segun iti resolusion a pinirmaan itay nabiit ni Ombudsman Samuel R. Martires, maidarum da Lao, Liong, ken De Guzman ken dagiti opisial ti Pharmally a da Twinkle Dargani, Mohit Dargani, Linconn Ong, Justine Garado, ken Huang Tzu Yen, iti panaglabsing iti Section 3(e) ti Republic Act No. 3019 (Anti-Graft and Corrupt Practices Act).
Karaman a maipila ti saggaysa a kaso ti graft kontra kada DBM Procurement Service Director IV Christine Marie L. Suntay, Procurement Management Officer V Webster Laurenana, dagiti empleado ti DBM a da August M. Ylagan ken Jasonmer L. Uayan, ken Krizle Grace Mago ti Pharmally.
Iti maysa pay resolusion ti Ombudsman, naduktalan a nagbasol da Lao, Liong, De Guzman, ken Laurenana iti grave misconduct, gross neglect of duty, serious dishonesty, ken conduct prejudicial to the best interest of the service. Madusa dagitoy iti pannakaikkat iti serbisio ken pannakaibabawi ti amin a benepisio ti panagretiro ken agnanayon a pannakadiskualipikar iti panagtrabaho manen iti gobierno.
Manipud Kadagiti Agdama a Kameng ti Bannawag: Dios ti Agngina!
Naduktalan met a nagbasol da Ylagan, Uayan, ken Suntay iti gross neglect of duty ken conduct prejudicial to the best interest of the service ket maikkatda iti serbisio ken maibabawi amin a benepisioda ken didan mabalin ti agtrabaho pay iti gobierno.
Kabayatanna, naduktalan met a nagbasol ni Department of Health (DOH) Assistant Secretary for Health, Public Services Team Nestor F. Santiago iti simple neglect of duty ket mamulta iti katukad ti makabulan a sueldona.
Gimmatang dagiti opisial ti DBM iti 8,000 a unit ti BGI Real Time Fluorescent RT-PCR Kits iti presio a PhP600-milion idi Abril 23, 2020. Kalpasanna, gimmatangda pay iti 2,000 a unit ti A*Star Fortitude RT-PCR Test Kits iti presio a PhP688-milion.
Idi Hunio 9, 2020, gimmatangda manen iti 41,400 a unit ti BGI Real Time Fluorescent RT-PCR Kits nga agpateg PhP2,877,300,000.
Kinuestionar ti Ombudsman ti pinansial a kabaelan ti Pharmally a makaala kadagiti test kit manipud kadagiti ganggannaet a manufacturer wenno supplier idi napili daytoy a pakaitedan ti PhP4.165-bilion a kontrata, aglalo ta aganay a PhP625,000 laeng ti paid-up capital daytoy.
Nakita ti Ombudsman a "kuestionable unay" dagiti presio nga insingasing ti Pharmally para kadagiti test kit. (CZARINA NICOLE ONG KI/ Manila Bulletin)
