BUNTIS FAIR. Insayangkat ti gobierno probinsial ti Ilocos Sur ti Buntis Fair kas culmination activity iti panangselebrar iti Nutrition Month. Nagiwaras ni Gobernador Jeremias “Jerry” Singson (maikapat manipud kanigid) iti buntis kits kadagiti masikog manipud iti nadumaduma nga ili ken siudad a nagatendar iti pasken, kaduana da Dr. La Paz Peredo (maikatlo iti kannigid) a nangibagi iti Provincial Health Office ken Engr. John Foz (kakanawanan) ti Provincial Department of Health Office. Naisayangkat bayat ti Buntis Fair ti maysa a forum a "Malusog na Pagbubuntis, Mga Dapat Iwasang Kemikal, Mental Health ni Mommy, Nutrisyon ni Nanay and First 100 Days ni Baby" a nakayadalan ti maipanggep iti panagsikog, salun-at ti masikog nga ina, panaganak ken postpartum care. Naipaayan pay iti agduduma a serbisio dagiti masikog nga inna a pakairamanan ti libre a panagala iti vital signs, pre-natal check-up, dental care, laboratory services ken adda pay libre a pukis ken masahe.
Naangay pay ti paripa, Mommies Got Talent, ken salip iti panagluto idinto a naisayangkat met ti KADIWA ni Ani at Kita iti ruar ti Provincial Farmers Livelihood Development Center a pakagatangan kadagiti produkto ken nasustansia a taraon para kadagiti masikog nga inna. (Teksto: Mancielito S. Tacadena/Ladawan:Pammadayaw ti Opisina ti Gobernador)
