Sangapulo ket dua nga opisial ti Department of Education (DepEd) ken ti Procurement Service ti Department of Budget and Management (PS-DBM) ti napatawan iti preventive suspension kas inkeddeng ti Office of the Ombudsman (OMB) iti pannakaimbestigarda gapu iti maatap nga overpriced (nangato unay ti presiona) a pananggatangda iti agbalor iti PhP2.4-bilion nga "outdated" a laptop idi 2021.
Iti suspension order a pinirmaan ni Ombudsman Samuel R. Martires, suspendido a saan nga agsueldo agingga a di malpas ti imbestigasion da DepEd Finance Undersecretary Analyn M. Sevilla, Administration and Procurement Undersecretary Alain Del B. Pascua, Assistant Secretary of Administration and Procurement Salvador C. Malana III, Director IV of Information and Communications Technology Services Abram Y.C. Abanil, Executive Assistant IV Alec S. Ladanga, Director IV ti Procurement Management Service Marcelo H. Bragado, ken Supervising Administrative Officer Selwyn C. Briones.
Iti biang ti PS-DBM, suspendido da Undersecretary Christopher A. Lao, Director IV Jasonmer L. Uayan, Procurement Management Officer IV Ulysses E. Mora, Procurement Management Officer I Marwan O. Amil, ken Procurement Management Officer V Paul Armand A. Estrada.
Segun iti darum, idi 2021, babaen ti PS-DBM, gimmatang ti DepEd kadagiti entry-level (nababa ti klasena) a laptop para kadagiti mannursuro iti publiko a pagadalan nga aggatad iti PhP58,300 tunggal maysa, idinto a ti naaprobaran a budget ket PhP35,046.50 laeng ti tunggal maysa.
Manipud Kadagiti Agdama a Kameng ti Bannawag: Dios ti Agngina!
Gapu iti "kinangato unay ti presio" ken "kina-outdated" dagiti laptop a nanayonan ti presiona iti PhP23,253 (tunggal maysa), saanen a makagatang ti DepEd iti laptop para iti 68,500 a mannursuro ket 39,583 a mannursuro laeng ti naikkan.
Nailanad iti order ni Martinez a mapagduaduaan ken saan a nainkalintegan ti proseso ti panaggatang gapu ta pinalubosan ti DepEd a ti PS-DBM ti gumatang iti laptop.
Gapu itoy, naipila ti darum a grave misconduct, serious dishonesty, and gross neglect of duty kontra kadagiti nadakamat nga opisial, a mabalin a pakaikkatanda iti serbisio. (Czarina Nicole Ong Ki/Manila Bulletin)
