Pinattapatta ti Philippine Atmospheric, Geophysical and Astronomical Services Administration (PAGASA) a mabalin nga umasideg unay wenno agdisso ti Bagyo a Goring (internasional a nagan: Saola) iti masakupan ti Batanes itoy nga Agosto 30.
Itay alas singko ti parbangon (Martes), nasaripatpatan ti sentro ni Goring iti 220 km daya ti Aparri, Cagayan.
Addaan ti kapigsaan ti angin umabot 155 kph asideg ti sentrona ken mabalin a pumegkes agingga 190 kph. Agpaamianan, amianan a laud iti kapardas a 10 kph.
Gapu iti manamnama a napigsa nga angin nga ipugso ni Goring, intuding ti PAGASA ti Signal number 3 iti amianan a daya a paset ti Babuyan Island.
TURISMO: Intayon Idiay Ayuyang Garden iti Pila, Siudad ti Laoag!
Adda iti signal number 2 ti Batanes, nabatbati a paset ti Babuyan Island, ken ti amianan a daya ti Cagayan; idinto a signal number 1 dagiti amianan ken akindaya a paset ti Cagayan, daya a paset ti Isabela, ken ti amianan a paset ti Apayao ken Ilocos Norte.
Iti Mierkoles, nakaro ti pigsa ti tudo iti Batanes ken Babuyan Island, idinto a napigsa a tudo ti sagrapen dagiti amianan a paset ti Ilocos Norte ken amianan a laud ti Cagayan.
Gagaraen ti napigsa a tudo a gapuanan ti abagat ti Occidental Mindoro, Zambales, Bataan, Cavite, Batangas, ti amianan a paset ti Palawan agraman dagiti isla ti Calamian ken Cuyo, Oriental Mindoro, ken Antique.
Inton Huebes, napigsa ti tudo iti Zambales, Bataan, Occidental Mindoro, Metro Manila, Rizal, Bulacan, Cavite, Batangas, ken Pangasinan.
Manamnama a rummuar ni Goring iti Philippine Area of Responsibility (PAR) inton Agosto 31. (Ellalyn De Vera-Ruiz/Manila Bulletin.)
