Insaaden ti Philippine National Police (PNP) iti entero a pagilian dagiti lugar a pagsukimatan (checkpoint) tapno maipatungpal ti pannakaiparit ti panagimet iti paltog (gun ban) iti panangrugi ti barangay and Sangguniang Kabataan elections (BSKE).
Binilin ni PNP chief Gen. Benjamin Acorda, Jr. amin a kameng ti polisia nga ipatungpalda dagiti nainget a pamuspusan iti seguridad tapno malapdan dagiti krimen a mainaig iti eleksion.
Nangrugi ti gun ban itay Agosto 28 a naigiddato iti panangrugi ti panagipila iti kandidatura dagiti agngayangay nga opisial ti barangay ken SK.
Iti uneg ti 94 nga aldaw, iparit ti Commission on Elections (Comelec) ti di autorisado a panagimet iti paltog ken makapapatay nga igam iti ruar ti pagtaengan, negosio, ken publiko a lugar, kas sagudayen ti Comelec Resolution No. 10918.
Manipud Kadagiti Agdama a Kameng ti Bannawag: Dios ti Agngina!
Segun iti pagannurotan, dagiti laeng kameng ti PNP, Armed Forces of the Philippines (AFP), Philippine Coast Guard (PCG) ken dadduma pay a pannakabagi ti linteg ti mailaksid iti gun ban, no la ket pinalubosan ti Comelec dagitoy.
Ngem tapno mailaksid iti gun ban, nasken a nakauniporme dagiti pannakabagi ti linteg bayat ti panangitungpalda iti opisial nga annongenda iti panawen ti eleksion.
Binallaagan ni Acorda ti publiko a liklikanda ti agimet iti paltog iti ruar bayat a maipatpatungpal ti gun ban tapno saanda a maidarum. (Aaron Recuenco/Manila Bulletin.)
