Inaprobaran ti Department of Budget and Management (DBM) ti 5,000 a posision a katulongan dagiti mannursuro iti eskuela ti gobierno iti entero a pagilian.
Segun iti DBM, 3,500 a posision ti agpaay a kas Administrative Officer-II a mangaramid iti pang-administratibo a trabaho dagiti mannursuro; idinto a 1,500 ti agpaay a kas Project Development Officer-I a mangsuporta iti pannakaipatungpal dagiti programa, proyekto, ken gannuat ti eskuela.
Maiwaras dagitoy a posision iti nadumaduma a rehion, agraman iti Metro Manila.
Sakbay daytoy, indagadag ti Teachers’ Dignity Coalition (TDC) ken ti Alliance of Concerned Teachers (ACT) Philippines iti Department of Education (DepEd) a mangted daytoy iti nabatad ken masinunuo a plano tapno makissayan ti trabahuen dagiti mannursuro iti para publiko a pagadalan. (Xander Dave Cabellos/Manila Bulletin.)
