Innem A Daniw Ni HONOR BLANCO CABIE
1
uppatda nga appo ni liloda,
parepareho nagbayengyeng, ay!
'diay inaramidda manglinglingay,
5 a Daniw
adda panangitag-ayna't rikna.
kadagiti uppat inaunaan
isut' adda 'ti drums, maikadua met
gitarra, maikatlo 'ta biolin ket
buridek di metten paunaan.
'diay ukelele ken 'diay pitona
isut' aramat 'diay buridek, ay!
ni liloda trombone daydiay iggem:
wen, nangbaringkuas 'diay dangdanggayda.
panagtokarda 'tay nangitag-ay,
namangsaludo ken namagraem.
*aaron, 17, drums; hail, 15, rhythm guitar; mikoy, 14, violin; milek, 7, flute and ukelele.
2
saanda man nga agsasango ngem
panaggigiddanda nga agtokar
mangted a dagus 'tay panagbang-ar
'toy mugingko, mangasut 'tay raem.
manipud lilo ken ama pati
payen appo a nagbayengyeng, ay!
matnag 'tay mukat a nakaapsay:
adda simbeng ken tunos 'toy puli.
'ti patit ti redoblante sadiay
oshawa ken ditoy cainta ta
danggayan a daras 'tay ub-ubbing:
tallo a nangkuerdas 'tay murmuray.
nakatiliw tuwwatot' karkarma,
ragsakda nga innem adda't sarming.
3
anian nga apal mang canor no 'tay
inna a mangngegan ti timekna
ni baritone sax, ay! mamurmuay
a dagus mugingna ken karkarma.
'kasdiay kabangegna koma' – innak
a nangngegan – 'toy bosesko, kasdiay
ti ap-apalan unay 'toy riknak,
mangin-indayon man 'tay linglingay.'
'kabangegna,' intuloyna, 'a ta
karabukobko kas dumanon 'diay
labes ti tumengko, ania ngatan,
atanud, ta dumanon 'diay daga.'
karabukob aguy-uyauy pay!
ania dayta a kinagasatnan.
4
ubing pay ni atanudko idi
agtoktokar salaan, wen, pito
pay lat' tawenna ngem kadagidi
mangmangngegkon puyotna't lubongko.
sakbay ti piesta no adda daytay
inda pagtokaran adda latta
ni 'tanud nga ubing ngem murmuray
'ti salonan – adut' pagayamna.
maysa a rabii kunan lakay
pascual, tangdan da musiko kano
inayon laengen 'ti pondo 'diay
aribai ti bukod a barrio.
ay! ngem inlaban mang justin daydiay
kaubingan tangdan awan kissay.
*teniente del barrio (kapitan ti awag itan).
**para tenor saxophone ti grupo.
5
agpaknika pay jaime* ta denggem
pamay-an amy galinato** 'diay
trumpetana – kasla agtartaray
kabalio dina maitured saem.
kamaten 'diay lalaki ngem anian
panaggaraigi 'diay notnotana,
bokilia no cerezo rosa ta
kimat rumisrissik 'ti sangodan.
adda laingyo nga agpada ngem
iti panirigak – ammok met 'tay
allegro, sinkopata – 'diay puyot
ni amy mangbaringkuas 'tay raem.
agurayka kadi: agtartaray
pay 'tay kabalio di agpapuyot?
*jaime calderon, inyam-ammo ni perez prado (dec 11, 1916-sept 14, 1989) a nagsolo iti cerezo rosa (cherry pink and apple blossom white).
**amy galinato (nov 19, 1939-june 30, 2008), 1st trumpet ti jolly boys orchestra ti paoay, ilocos norte, philippines.
6
di ipalubos a masagid 'diay
likud kabalio 'ti garraigina,
kunam lan pana ti kapardasna
mangilikuliko't panagtaray.
aguy-uyaoy ti bayengyeng met
'diay dumalagudog likud, anian
kas man awan daytay babannogan
iti rugso a makaisaluket.
kasdiay notnotan galinato* 'ti
sangnguanan stompers no piestat' laoag,
saan nga agnerbios 'diay dilana
no suksukdalennan 'tay fa do ti.
panagkulagtit dilana, salbag
anian pangmurmuray pamay-anna.
*amy galinato, taga paoay, ilocos norte, nakatakder uppat a metro laeng kaadayona iti reeds section (2 nga alto sax, 2 a tenor sax, 1 a bari sax, ken 1 a conga ti stompers ti laoag a kalabanda nga agtokar iti maysa a rabii ti piesta ti laoag.
