Nangidatag iti joint resolution da Senate President Juan Miguel “Migz” Zubiri ken Senador Pia Cayetano tapno maiwayat ti imbestigasion iti viral a panagsinnubang iti kalsada ti maysa a sigud a polis, ken maysa a bumibisikleta iti Quezon City.
Sinuportaran ni Cayetano, a maysa met a bumibisikleta, ti kiddaw ni Senador Jinggoy Ejercito Estrada a mangtingiting iti aramid ni Wilfredo Gonzales a sigud a polis.
Inanamongan ni Zubiri daytoy a gannuat, ket kinunana a masapul a maiparit ti kastoy a kita ti panagpungtot iti kalsada (road rage).
Iti naipila a Senate Resolution No. 763, dinakamat dagiti senador ti report a napilit a nagpirma ti bumibisikleta iti katulagan ken ni Gonzales, ket napuersa pay a nangted iti PhP500 a bayad ti nadadael iti nalabaga a sedan a manmanehuen ni Gonzales.
Manipud Kadagiti Agdama a Kameng ti Bannawag: Dios ti Agngina!
Naammuan pay dagiti senador a naikkat iti serbisio ni Gonzales gapu iti di umisu a kababalinna kas polis.
Tamingen pay ti resolusion ti kinatalged dagiti bumibisikleta iti kalsada ken ti panangited iti karbengan a mangaramat iti kalsada nga agpapan ita, segun kadagiti senador, ket yaleng-aleng ti adu a Filipino. (Hannah Torregoza /Manila Bulletin)
