Mabalin ti asino man nga addaan impormasion maipapan kadagiti maipuspuslit a bagas ken kontrabando a bambanag ti agipulong iti Bureau of Customs (BOC) ken maikkan iti gunggona (reward) a 20-porsiento ti balor ti matiliw a puslit wenno kontrabando, kinuna ni Commissioner Bien Rubio, hepe ti Aduana (Customs), itay nabiit.

Segun ken ni Rubio, addaan ti BOC iti "reward system" iti babaen ti Customs Modernization and Tariff Act (CMTA).

"Agarup 20-porsiento ti balor ti makompiskar a tagilako a mabalin a maisubasta ti maited a gunggona," kinuna ni Rubio.

Dagiti addaan impormasion maipapan kadagiti puslit a bagas wenno dadduma pay a tagilako, mapan laeng iti website ti Aduana iti customs.gov.ph iti babaen ti Customer Assistance and Response Service (CARE).

“Adda link dita (a website) para iti amin nga impormante ken impormasion kadagiti maatap a naipuslit a tagilako," kinuna met ni Customs Intelligence and Investigation Service (CIIS) Director Verne Enciso.

Malagip nga itay nabiit, binilin ni Presidente Ferdinand Marcos Jr. ti BOC nga iganetget daytoy ti pananglaban iti panagipuslit ken panagilebben iti bagas. (RAYMUND ANTONIO/ Manila Bulletin)