Kinompiskar dagiti kameng ti Customs Intelligence and Investigation Service (CIIS) ti Bureau of Customs (BOC) ti agarup PhP519-milion ti balorna a bagas ken irik iti naiwayat nga inspeksion iti uppat a bodega iti Bulacan itay Agosto 30.
Naduktalan dagiti kameng ti CIIS a kinuyog ti CIIS-MICP (Manila International Container Port) ken ti Task Force Aduana ti Philippine Coast Guard (PCG) ti 154,000 a sako ti inangkat a bagas, ken 60,000 a sako ti irik.
Agarup PhP431-milion ti balor ti 154,000 a sako a bagas a naggapu iti Vietnam ken Pakistan; idinto nga agbalor iti PhP88-milion ti 60,000 a sako nga irik.
Segun ken ni BOC Commissioner Bien Rubio, apaman a dimmanon kenkuana ti report ti CIIS nga adda rinibu a sako ti bagas a nakadulin iti ili ti Bocaue ken Balagtas, impaulogna a dagus ti Letter of Authority (LOA) ket sinukimatda dagiti uppat a bodega: ti Gold Rush Ricemill/Warehouse iti San Juan (Balagtas), ti bodega nga adda iti uneg ti Intercity Industrial Complex iti San Juan (Balagtas), ti JJS Rice Mill/ Warehouse ken ti Gold Rush Rice Mill 2 (agpada nga adda iti Wakas, Bocaue).
TURISMO: Intayon Idiay Ayuyang Garden iti Pila, Siudad ti Laoag!
Kimmuyog iti kellaat nga inspeksion ni House Speaker Martin Romualdez ken da Congressman Erwin Tulfo, Wilfrido Mark Enverga, ken Ambrosio Cruz Jr.
Idi Agosto 24, agbalor iti PhP500-milion ti naduktalan ti BOC a 202,000 a sako a bagas a naggapu iti Vietnam, Cambodia ken Thailand a nakadulin iti bodega iti met laeng Bulacan. (Aaron Recuenco/Manila Bulletin.)
