Inaprobaran ni Presidente Ferdinand "Bongbong" Marcos Jr. ti rekomendasion ti Department of Agriculture (DA) ken ti Department of Trade of Industry (DTI) a mangikeddeng iti kangatuan a gatad ti bagas iti pagilian, babaen ti Executive Order (EO) No. 39 a naipaulog itay Agosto 31.
Segun iti Republic Act (RA) No. 7581, wenno ti Price Act, maikkan iti karbengan ti Presidente a mangikeddeng iti kangatuan a presio iti ania man a nasken a kasapulan ti tao (kas iti bagas), babaen ti rekomendasion ti Price Coordinating Council ken mayanatup iti kondision nga inkeddeng ti linteg.
Iti EO a pinirmaan ni Executive Secretary Lucas Bersamin, PhP41 ti naikeddeng a presio ti regular milled a bagas, idinto a PhP 45 ti well-milled a bagas.
Agtalinaed a maipatungpal ti naikeddeng a presio ti bagas, malaksid no ibabawi ti Presidente babaen ti rekomendasion ti Price Coordinating Council, wenno ti DA ken ti DTI.
Manipud Kadagiti Agdama a Kameng ti Bannawag: Dios ti Agngina!
Immandar ni PBBM iti DA ken DTI ti nainget a pannakaipatungpal iti naikeddeng a presio ti bagas, panangwanawan ken pannakaimbestigar ti panagtignay ti presio ti bagas iti pagtagilakuan.
Binilin pay ni PBBM ti Bureau of Customs (BOC) a papigsaenda ti panangsukimat ken panangraut kadagiti bodega tapno malapdan ti panagilemmeng ken ilegal a panagangkat iti bagas iti pagilian.
Idi Agosto 28, impakaammo ti DA nga aggatad iti PhP42 agingga PhP55 ti tunggal kilo ti regular milled a bagas, idinto a PhP48 agingga PhP56 ti tunggal kilo ti well-milled a bagas iti Metro Manila.
Tinudingan ni PBBM ti Philippine National Police (PNP) ken dadduma pay a pannakabagi ti linteg a tulonganda ti DTI ken DA tapno masierto ti pannakaipatungpal ti naikeddeng a presio ti bagas iti pagilian. (Argyll Cyrus Geducos/Manila Bulletin)
