Kalikaguman ni Camarines Sur 2nd district Rep. LRay Villafuerte ti panagbalin a linteg ti House Bill (HB) No. 7982 nga am-ammo pay a kas "Mobile Subscribers Protection Act" a mangsalaknib kadagiti kustomer manipud iti naalas a serbisio dagiti telecommunications company (telco).
Agbalin ti HB 7982 a katulongan ti Republic Act (RA) No.11934 (wenno ti SIM Registration Act), mangipanamnama iti nalaklaka, naan-annayas, ken naan-anay a serbisio nga ipaay dagiti telco kadagiti kustomerda.
Salakniban ti HB 7982 ti pagsayaatan dagiti Filipino nga agus-usar iti selpon babaen ti pannakatengngel ti presio, pannakaikkat ti panagpaso (expiration date) ti prepaid load, pannakaibinsabinsa ti bayadan (bill) iti postpaid ken prepaid a suskripsion, ken panagtalinaed ti bukod a numero ti selpon ania man a telco ti mangiggem iti daytoy.
Agmulta dagiti telco nga aglabsing iti HB No.7982 manipud iti PhP1-milion agingga iti PhP10-milion, wenno masuspende ti prangkisa ken dadduma pay a lisensia nga impaay ti National Telecommunications Commission (NTC) kadagitoy. (Ellson Quismoro/Manila Bulletin)
