Aganay a 3,558 a pamilia nga apektado ti bagyo a Goring ti naipaayan iti ayuda manipud iti opisina ni House Speaker Ferdinand Martin G. Romualdez babaen ken ni 1st District Representative Ramon C. Nolasco Jr.
Maysa kadagiti napakaruan a dinidigra ti bagyo ti ili ti Santa Teresita iti idadalan ni Goring iti Cagayan Valley ken Ilocos Region itay Agosto 25-29.
Inawat ti munisipio babaen ken ni Mayor Rodrigo De Gracia ti ayuda ket naibunong a dagus iti kaaldawan ti bagyo babaen ti panangidaulo ti DSWDO-Municipal Action Team nga inwanwan da Municipal Link Officer Kathleen Ann S. Acosta ken MSWDO Marivic T. Viesta ken babaen ti suporta ti Benevolent Lady's Association of Santa Teresita (BLAST) nga idauluan ni Executive President Jocelyn O. De Gracia. Naited dagiti pakauna nga ayuda a food packs ken hygiene kits kadagiti umili a nagkamang kadagiti naituding nga evacuation center iti kada barangay.
Segun iti record ti Municipal Disaster Risk Reduction Management Office (MDRRMO), naggapu dagiti 3,558 a pamilia kadagiti nalayus a nababa a lugar iti 13 a barangay ti ili.
Manipud Kadagiti Agdama a Kameng ti Bannawag: Dios ti Agngina!
"Rabii pay laeng iti Agosto 25, maiwarwarasen dagiti ayuda kadagiti evacuation center," kinuna ni Ms. Acosta. "Napartak ti panagtignaymi ta na-divide ti grupo nga agibunong kadagiti barangay." Innayonna a nupay napigsa ti agus ti danum a linasat ti luganda iti dayta a rabii, indanonda ti saranay kadagiti umili.
Segun pay ken ni MDRRMO Emerson Aleste, "gapu iti kinaridam ken superbision ni Mayor De Gracia, awan ti nadangran nga umili."
Timmulong pay dagiti staff ni Rep. Nolasco Jr., babaen ti panangidaulo ni Rowena Retoma, a nagibunong kadagiti ayuda kasta met dagiti kameng ti Philippine National Police-Santa Teresita, Philippine Army, Philippine Marines ken dadduma pay. (Edison B. Tobias /Pammadayaw a ladladawan manipud Municipality of Santa Teresita)
