Kalpasan ti panangyalatda iti kampeonato iti Hong Kong International Math Olympiad (HKIMO), iti World International Math Olympiad (WIMO) met ti sumaruno a pakisalipan ti lima a nasaririt nga estudiante ti Sarrat National High School (SNHS) iti Ilocos Norte a maangay iti Hanoi, Vietnam inton Disiembre.
Inyalat da Brian Jansen Vallejo, Allen Iver Barroga, Zyrene Angelica Dulluog, Natalie Margaret Balisacan, ken Ma. Cassandra Reich Doque ti maysa a "world champion," maysa a "world star,” dua a first runner-up ken lima a balitok a gunggona iti HKIMO idi Agosto 25 agingga 28 a dinar-ayan ti 17 a pagilian manipud iti Asia, Europa, Africa, ken Oceana.
Ti kaudiaan a panangabak dagiti lima nga estudiante ti nangpatalged kadakuada a mangibagi iti Filipinas iti WIMO a dar-ayan dagiti estudiante a kalaingan iti matematika manipud iti nadumaduma a paset ti lubong, segun ken ni Department of Education Ilocos Norte Superintendent Donato Balderas Jr.
Kinuna ni Balderas a ni Vallejo ti kapintasan ti rekord ta isu ti nangyalat iti world star ken world champion para iti Secondary 1.
TURISMO: Intayon Idiay Ayuyang Garden iti Pila, Siudad ti Laoag!
Ti SNHS laeng ti kakaisuna a pagadalan iti Ilocos Norte a naddaan iti programa para iti matematika babaen ti Department of Science and Technology (DOST). (Teksto: Pammadayaw ni Leilanie A. Adriano ti pna.gov.ph.)
