Apagbiit laeng a panglakagan ti naituding a presio ti bagas nga impaulog ni Presidente Ferdinand "Bongbong" Marcos Jr., segun ken ni House Speaker Martin Romualdez.
Iti Executive Order (EO) No. 39 naikeddeng a PhP41 ti tunggal kilo ti regular milled, idinto a PhP45 ti tunggal kilo ti well-milled a bagas.
Kinuna ni Romualdez a saan unay agpaut ti panangtengngel ti gobierno iti presio ti bagas, ngem naipaulog daytoy tapno malapdan ti panagngato ti presio ti bagas, ken tapno maipakita a napasnek ti tarigagay ni Presidente Marcos para iti natalged a suplay ken umisu a presio ti bagas.
Saan a dinakamat ni Romualdez no kaano nga agpatingga ti direktiba ti Presidente.
TURISMO: Intayon Idiay Ayuyang Garden iti Pila, Siudad ti Laoag!
Binallagaan ketdi ni Romualdez dagiti agiduldulin ken nalabes nga agganganansia iti bagas nga agtultuloy latta dagiti panagsukimat kadagiti bodega, saan laeng nga iti Luzon, no di ket agraman iti Visayas ken Mindanao. (Ellson Quismoro/Manila Bulletin.)
