Sangsangalen ti Department of Social Welfare and Development (DSWD) ken ti Department of Trade and Industry (DTI) ti isayangkatda a Sustainable Livelihood Program (SLP) para kadagiti aglaklako iti bagas a naapektaran ti Executive Order (EO) No. 39 a nangituding iti presio ti bagas.
Iti pannakiinnuman ni DSWD Secretary Rex Gatchalian ken ni DTI Undersecretary Carol P. Sanchez iti DSWD Central Office itay Septiembre 6, dinakamatda no kasano a naannayas a maipatungpal ti SLP cash payout ti DSWD a maitunos iti EO 39 a nangrugin a naipatungpal itay Septiembre 5.
Ti DTI ti natudingan a mangammo no asino dagiti addaan iti babassit a tiendaan babaen ti tulong dagiti rice retailers association.
Kinuna ni DSWD Assistant Secretary for Strategic Communications ken Spokesperson Romel Lopez a naangay ti miting tapno mapapardas ti pannakaileppas ti listaan dagiti kualipikado a maikkan iti Php15,000 nga ayuda iti entero a pagilian segun iti SLP.
Manipud Kadagiti Agdama a Kameng ti Bannawag: Dios ti Agngina!
Nupay pagrebbengan ti DSWD ti panangiwaras iti ayuda, ti DTI ti mangtaming kadagiti rumsua a reklamo. (Ellalyn De Vera-Ruiz/Manila Bulletin)
