Iti Retreat Session ti 43rd Association of Southeast Asian Nations (ASEAN) iti Jakarta, Indonesia itay Septiembre 5, kiniddaw ni Presidente Ferdinand “Bongbong” Marcos Jr. kadagiti amin a maseknan nga agparbengda koma iti ania man nga aramidenda a mabalin a mangparubrob iti riri iti West Philippine Sea (WPS).
Inaklon ni PBBM a saan a dagus a maibanag ti arapaap ti Filipinas para iti kinatalinaay ken kinatalged iti West Philippine Sea.
Kinuna ni PBBM nga agtultuloy latta ti pannakitinnulong ti Filipinas tapno agtalinaed ti maibasar-linteg a kinaurnos iti sangalubongan.
Kinorehir ni Marcos ti di umisu a kapanunotan a ti parikut iti WPS ket gapuanan laeng ti panagsinnalisal ti dua a pagilian, idinto nga impaganetgetna a ti Filipinas ket saan nga agsapsapul iti riri, ngem salsalakniban laeng daytoy ti karbenganna. (Argyll Cyrus Geducos/Manila Bulletin)
