Imbatad ti Department of Agriculture (DA) a 95-porsiento a nagballigi ti pannakaipatungpal iti Executive Order No. 39 sipud idi Septiembre 5.
Kinuna ni DA spokesperson ken director of legal services Willie Ann M. Angsiy itay Septiembre 7 a saan a maliklikan nga adda latta dagiti aglaklako iti bagas a di umanamong iti naituding a presio, ngem ad-adu latta dagiti nagtungpal ket itultuloy latta ti DA ti mangipalawag kadagiti maseknan.
Inaklon ni Angsiy nga adda dagiti negosiante a nakagatang iti nanginngina a regular-milled ken well-milled a bagas, ngem impanamnamana a tulongan ida ti gobierno iti pinansial, lohistika, ken koneksion iti merkado.
No maipapan iti panangtengngel iti kasasaad ti suplay dagiti aglaklako, kinuna ni Angsiy a makitinnulong ti PRISM (Philippine Rice Industry Stakeholders Movement), ti pribado a sektor, ken dagiti agang-angkat tapno masinunuo nga adda umdas a suplay. Kasarsarita ti DA dagiti mannalon tapno isuda ti direkta a mangsuplay kadagiti aglaklako iti bagas, ket ditoy a bumallaet ti DA.
Manipud Kadagiti Agdama a Kameng ti Bannawag: Dios ti Agngina!
Innayon ni Angsiy a ti National Food Authority (NFA) ti napusgan a mangtingiting iti kalidad ken klase ti bagas a mailaklako iti tiendaan.
Kinuna ni Angsiy nga inadal a naimbag dagiti maseknan nga ahensia ti gobierno ti inrekomendarda a presio ti bagas ken ni Presidente ken Agriculture Secretary Ferdinand “Bongbong” R. Marcos Jr. (Jel Santos/Manila Bulletin.)
