"Adayo a makigubat ti Filipinas." Daytoy ti insungbat ni Department of National Defense (DND) Secretary Gilbert "Gibo" Teodoro Jr. iti saludsod ni Kabataan Party-list Rep. Raoul Manuel maipapan iti panagtignay ti Estados Unidos iti West Philippine Sea (WPS).
Iti pannakabista (hearing) iti badiet ti DND itay Septiembre 4, pinalutpot ni Manuel no apay nga ipalpalubos kano ti Filipinas ti ar-aramiden ti United States (US) a kasla agsagsagana a makigubat iti WPS.
Imbatad ni Teodoro a dina kayat ti gubat, ket kinunana a saan a ti US ti mangipatpaturong ti water cannon iti Filipinas, no di ti China.
Inlawlawag pay ni Teodoro a saanen a baro ti pannakialiansa ti maysa a pagilian iti sabali a pagilian, ta uray ti China ket adda met kaaliansana a pagilian, ket aktibo daytoy iti pannakialiansana. (Ellson Quismorio/Manila Bulletin)
